सिन्धुपाल्चोक — राजन थापा नेपाली कांग्रेसको १५औँ महाधिवेशनअन्तर्गत सिन्धुपाल्चोक प्रतिनिधि सभा क्षेत्र नं. १ बाट पेशागत विषय विज्ञतर्फ केन्द्रीय महाधिवेशन प्रतिनिधिमा निर्वाचित अधिवक्ता भीम प्रसाद पौडेलले आफ्नो विजयलाई व्यक्तिगत उपलब्धिभन्दा पनि मतदाताले आफूलाई सुम्पिएको महत्वपूर्ण जिम्मेवारीका रूपमा लिएका छन्।
निर्वाचनमा आफ्नो पक्षमा अमूल्य मत दिई विजयी गराउने सम्पूर्ण मतदाताप्रति आभार व्यक्त गर्दै पौडेलले आफूलाई प्राप्त मतलाई विश्वास, जिम्मेवारी र अपेक्षाको प्रतीकका रूपमा लिएको बताएका छन्।
पौडेलले भने, “यो मेरो मात्र विजय होइन, मप्रति विश्वास गर्ने प्रत्येक मतदाताको विजय हो। तपाईंहरूले दिनुभएको मत केवल निर्वाचन जिताउने मत होइन, मेरो काँधमा थपिएको एउटा ठूलो जिम्मेवारी हो। तपाईंहरूको विश्वासलाई कहिल्यै कमजोर हुन दिने छैन।”
मतदाताको विश्वासलाई कहिल्यै कमजोर हुन दिने छैन’
उनले आगामी दिनमा मतदाताका आवाज सुन्ने, सुझाव र अपेक्षालाई आत्मसात् गर्ने तथा प्राप्त जिम्मेवारीलाई इमानदारी, निष्ठा र प्रतिबद्धताका साथ निर्वाह गर्ने प्रतिबद्धता व्यक्त गरेका छन्।
“निर्वाचन सकिएको छ, तर जिम्मेवारी अब सुरु भएको छ। अब म आफूलाई मतदान गर्नेहरूको मात्र होइन, सबैको प्रतिनिधिका रूपमा उभिनेछु। व्यक्तिगत आग्रह–पूर्वाग्रहभन्दा माथि उठेर पार्टीको संगठन, लोकतान्त्रिक मूल्य–मान्यता र जनताको हितका लागि आफ्नो भूमिका निर्वाह गर्नेछु,” पौडेलले भने।
निर्वाचनका क्रममा आफूलाई साथ, सहयोग, सद्भाव र हौसला प्रदान गर्ने नेपाली कांग्रेसका अग्रज नेतागण, क्षेत्रीय प्रतिनिधि, साथीभाइ, शुभेच्छुक तथा सम्पूर्ण कांग्रेसजनप्रति पनि उनले विशेष धन्यवाद व्यक्त गरेका छन्।
पौडेलले आफूलाई प्राप्त जिम्मेवारीलाई अवसरभन्दा बढी कर्तव्यका रूपमा लिएको बताउँदै आगामी दिनमा निरन्तर जनसम्पर्कमा रहने र पार्टी तथा लोकतान्त्रिक मूल्य–मान्यतालाई बलियो बनाउन आफ्नो क्षेत्रबाट योगदान गर्ने प्रतिबद्धता जनाएका छन्।
“तपाईंहरूले ममाथि गर्नुभएको विश्वास मेरो लागि ठूलो सम्मान हो। यही विश्वासलाई मेरो शक्ति बनाएर अझ जिम्मेवार भएर अघि बढ्नेछु। मतदाताले दिएको विश्वास मेरो जितको प्रमाण मात्र होइन, मेरो जिम्मेवारीको सुरुवात हो,” उनले भावुक हुँदै भने।
अन्त्यमा पौडेलले आफूलाई मतदान गर्ने मात्र नभई निर्वाचन प्रक्रियामा प्रत्यक्ष–अप्रत्यक्ष रूपमा सहयोग गर्ने सम्पूर्णप्रति पुनः हार्दिक आभार व्यक्त गर्दै “यो विश्वासलाई कर्मबाट प्रमाणित गर्नेछु” भन्ने प्रतिबद्धता दोहोर्याएका छन्।